Генеральны сакратар NATO Марк Рутэ паабяцаў, што Украіна зробіцца чальцом Паўночнаатлантычнага альянсу. Але калі гэта можа адбыцца, не патлумачыў.
Як піша выданне «Європейська правда», Марк Рутэ зрабіў гэтую заяву ў Бруселі на наступны дзень пасля прэзентацыі прэзідэнтам Уладзімірам Зяленскім украінскага плану перамогі, адзін з пунктаў якога ‒ атрыманне запросінаў на ўступленне ў NATO. Рутэ ўстрымаўся ад таго, каб сказаць, ці сталі дзяржавы Альянсу больш добразычлівыя да прапановы такога запрашэння Украіне.
«На гэты момант выглядае, што Украіна будзе 33-м чальцом. Але, магчыма, перад імі вынырне хтосьці іншы. Але Украіна будзе чальцом NATO ў будучыні. Гэта тое, што мы пастанавілі ў Вашынгтоне. Таму пытанне цяпер пра храналогію», ‒ падкрэсліў ён.
Цяпер, паводле Рутэ, саюзнікі сканцэнтраваныя на намаганнях, якія пракладваюць мост да сяброўства Украіны.
«Таму, калі ёсць канкрэтнае пытанне «Калі?», я не магу даць на яго адказ цяпер, на гэты момант. Але мы працуем над усімі гэтымі кірункамі, каб насамрэч яны аднойчы сталіся сябрамі NATO», ‒ дадаў Рутэ.
Глеб Нержын belsat.eu
